Archive for 2013

പശുവളർത്തലിലെ പൊടിക്കൈകൾ..

അകിടിലെ നീരു മാറുവാനായി കുറച്ച് നിർദ്ദേശങ്ങൾ.
അകിടിൽ വെളിച്ചെണ്ണാ പുരട്ടിയ ശേഷം അകിടിൽ വെള്ളം അടിക്കുക.
ഞെരിഞ്ഞിൽ ഇടിച്ചു പൊടിച്ച് വെള്ളത്തിൽ ഇട്ടു തിളപ്പിച്ച് അരിച്ചു കൊടുക്കുക.
അകിടിൽ കട്ട തൈരു പുരട്ടുക.
ചതകുപ്പ അരിക്കാടിയിൽ അരച്ച് നീരുള്ള ഭാഗത്ത് പുരട്ടുക.

ദഹനക്കേടിനു വേണ്ടിയുള്ള പ്രയോഗങ്ങൾ..
അയമോദകം വറുത്ത് പൊടിച്ച് ശർക്കര ചേർത്ത് കൊടുക്കുക.
ഇഞ്ചി, വെറ്റില, ചുവന്നുള്ളി, കുരുമുളക് എന്നിവ അരച്ച് ശർക്കര കൂട്ടി അപ്പക്കാരം ചേർത്ത് കൊടുക്കുക.
കുറച്ച് വെള്ളത്തിൽ യൂക്കാലി ചേർത്ത് കൊടുക്കുക.

പുളിയില അരച്ച് തൈരിൽ ചേർത്ത് അകിടിൽ പുരട്ടുക, നിലനാരകം മഞ്ഞൾ കൂട്ടി അരച്ചിടുക, പഴുതാരകൊല്ലി ഉപ്പ് ചേർത്ത് അരച്ചിടുക ഇവയൊക്കെ അകിടുവീക്കത്തിനുള്ള നാടൻ പ്രയോഗങ്ങളാണു.

ഗർഭിണിയാവാൻ പ്രയാസം ഉള്ള കിടാരികൾക്ക് ശുദ്ധി ചെയ്ത വേപ്പെണ്ണ കൊടുത്താൽ ഗർഭസാധ്യത കൂടും. രോമമൊക്കെ ചുരുണ്ട് പള്ള വീർക്കൽ ഉള്ള കിടാവുകൾക്ക് ഈ പ്രയോഗം ആരോഗ്യം കൊടുക്കും.

പശുക്കളിലെ മുറിവ് പഴുത്ത് അതിൽ പുഴുവെക്കാൻ തുടങ്ങിയാൽ അതിനെ വേഗം പുറത്തെടുക്കുവാനായി അല്പം പാറ്റ കായ പൊടിച്ച് മുറിവിലിട്ടാൽ മതിയാകും. കൂടാതെ കുളമാവിൻ പശ എടുത്തെ പുഴു പിടിച്ച മുറിവിലിട്ടാലും പുഴു പുറത്ത് പോകും.

എരുക്കില നീരു സമം ആവണക്കെണ്ണ ചേർത്ത് അല്പം ഇന്തുപ്പ് കൂട്ടി നൽകിയാൽ വയർ വീർക്കൽ, മലബന്ധം ഇവ മാറും.

ആറ്റു തകര കാടി വെള്ളത്തിൽ അരച്ച് പുരട്ടിയാൽ പശുവിന്റെ ദേഹത്തെ പുഴുക്കടി മാറികിട്ടും.

ഏഴു ദിവസം അടുപ്പിച്ച് പാളയംതോടൻ പഴം പത്തെണ്ണം വീതം കൊടുക്കുക. കോഴിമുട്ടയും എണ്ണയും ചേർത്ത് പശുവിനു നൽകുക, ഇതൊക്കെ പാൽ വർദ്ധിപ്പിക്കാനുള്ള പഴമക്കാരുടെ നാട്ടറിവ്.

കടപ്പാട്... മിഥുൻ, നന്ദകുമാർ 

ടോണിച്ചായനോട് ചോദിക്കാം.. ഭാഗം 2...

കൃഷി ഗ്രൂപ്പിലെ അംഗങ്ങൾ, ജൈവകർഷകനും, പരിസ്ഥിതി പ്രവർത്തകനുമായ ശ്രീ ടോണി തോമസിനോട് ചോദിച്ച ചോദ്യങ്ങളും അവയ്ക്ക് അദ്ദേഹം നൽകിയ മറുപടികളും..


ചോദ്യം.. . ജൈവകർഷകരുടെ കൂട്ടയ്മ താങ്കളുടേയും മറ്റു സഹപ്രവർത്തകരുടെയും പ്രവർത്തനം കൊണ്ട് നല്ല രീതിയിൽപോകുന്നുവെന്ന് അറിയാൻ കഴിഞ്ഞു. ഈ കൂട്ടായ്മയുടെ പ്രവർത്തന രീതിയും, ഉദ്ദേശ ലക്ഷ്യങ്ങളും ചെറുതായി വിശദീകരിക്കുമോ..?
മറുപടി... കേരള ജൈവ കര്‍ഷക സമിതി 1988ല്‍ യശശരീരരായ പ്രൊഫ. ജോണ്‍സി ജെകബ്‌ , വര്‍മ്മാജി തുടങ്ങിയവരുടെ ആഗ്രഹത്തോടെ തുടങ്ങിയതാണ്. ജൈവ കൃഷി പ്രോത്സാഹിപ്പിക്കുക, അതുവഴി ശുദ്ധമായ ആഹാരവും ആരോഗ്യവും ഉറപ്പാക്കുക. എന്നതായിരുന്നു ലക്‌ഷ്യം. ആ ലക്ഷ്യത്തിലേക്കുള്ള ഓട്ടത്തിലാണ് ജൈവ കര്‍ഷക സമിതി. ഇന്ന് ഒരുമിച്ചു കൂടാന്‍ സാധ്യമല്ലാത്ത അത്രയും ആള്‍ക്കാര്‍ ആയിക്കഴിഞ്ഞതിനാല്‍ ജില്ലാ സമിതികള്‍ രൂപീകരിച്ചു പ്രവര്‍ത്തനം പ്രാദേശികം ആക്കാനുള്ള ശ്രമത്തിലാണ്. ഏറ്റവും മെച്ചം ആയി പ്രവര്‍ത്തിക്കുന്നത് ഒന്ന് പാലക്കാട് ജില്ല, രണ്ടു മലപ്പുറം ജില്ല, മൂന്ന് തൃശൂര്‍ ജില്ല, നാല് ആലപ്പുഴ ജില്ല. ജില്ലയില്‍ നിന്ന് താഴോട്ടു ഇറങ്ങി ബ്ലോക്ക്‌ തലത്തിലും പഞ്ചായത്ത് തലത്തിലും സമിതിയുടെ യൂണിറ്റുകള്‍ പല ഭാഗത്തും ആരംഭിച്ചു കഴിഞ്ഞു. അടുത്ത ലക്‌ഷ്യം ഈ ജൈവ ഉല്പന്നങ്ങള്‍ക്ക് പ്രത്യേക വിപണി ആണ്. അതിനുള്ള ശ്രമത്തിലാണ് ഇപ്പോള്‍.. 
സാമ്പത്തികം ശരിയല്ലത്തതിനാല്‍ അത് പതുക്കയെ നീങ്ങുന്നുള്ളൂ.

ചോദ്യം...കാർഷിക വൃത്തിയിലേക്കിറങ്ങാൻ തയ്യാറാവുന്ന ഒരാളോട് അനുഭവസമ്പത്തിന്റെ പിൻബലത്തിൽ ടോണിച്ചായൻ നൽകുന്ന ഉപദേശം എന്തായിരിക്കും.

മറുപടി... ഒരു സര്‍ക്കാര്‍ ജോലിയില്‍ നിന്ന് കിട്ടുന്ന വരുമാനം (ശമ്പളവും കിമ്പളവും) കിട്ടുമെന്ന പ്രതീക്ഷയില്‍ കൃഷിയില്‍ ഇറങ്ങരുത്. പക്ഷെ അതിനേക്കാളേറെ മനസുഖം കിട്ടും. ശരിക്ക് മാര്‍ക്കറ്റ്‌ പഠിച്ചു ദീര്‍ഘവീക്ഷണത്തോടെ വിളകള്‍ തിരഞ്ഞെടുക്കുക. ഒരു വിളയെ മാത്രം ആശ്രയിക്കരുത്. പെട്ടന്ന് വില കൂടുന്നത് കണ്ടു ഒരു പുതിയ വിളയുടെ മുന്‍പില്‍ കയറി ഓടരുത് (ഉദാ:വാനില ). വളത്തിന്റെ ഉള്‍പ്പടെ കൃഷിയിടം സ്വയം പര്യാപ്തം ആകണമെന്ന ലക്ഷ്യത്തോടെ പ്ലാന്‍ ചെയ്യണം. പരമാവധി സ്വന്തം ആവശ്യത്തിനുള്ള ഭക്ഷണം കൃഷിയിടത്തില്‍ ഉണ്ടാക്കണം, അതും വിഷമില്ലാതെ. ആശുപത്രിയില്‍ കൊടുക്കുന്ന പണം ലാഭം.

ചോദ്യം..തെങ്ങ് കൃഷി വളരെ നഷ്ടത്തിലാണ് വലിയ പ്രശ്നം ഉല്പതനസെഷി കുറഞ്ഞ തെങ്ങും തേങ്ങയിടാൻ ആളെ കിട്ടാത്തതും അതുകൊണ്ട് ഇപ്പോഴുള്ള മുഴുവാൻ തെങ്ങും പിഴുതു മറ്റി ഉല്പതനസെഷി കൂടിയ വളര്ച്ച{ഉയരം } കുറഞ്ഞ ഇനം പരീക്ഷിച്ചാലോ എന്നൊരു ആലോചന മാത്രമല്ല ഇളനീർ വിളവെടുപ്പ് ആണ് നാൻ ഉദ്ടെഷികുന്നത് ഇത് പ്രബല്യതിലാകാൻ എത്ര മുതലിരകേണ്ടി വരും പെർ യുണിറ്റ് പറഞ്ഞാല മതി 2 ഇത് വിളവെടുപ്പിനു പാകമാകാൻ എത്ര കാലം എടുക്കും 3 ഈ പരീക്ഷണം വിജയികുവാൻ സദ്യതയുണ്ടോ ?അതോ മണ്ടത്തരം എന്നുള്ള പരിഹാസം കേള്കേണ്ടി വരുമോ
മറുപടി.. പരിഹാസം പല തരത്തില്‍ കേള്‍ക്കേണ്ടി വരും. അത് കാര്യമാക്കതിരിക്കുക. തെങ്ങിന് ഉല്പാദനം കുറവാണെങ്കില്‍ വെട്ടി പുതിയവ വക്കണം. കരിക്കിനെ മാത്രം ആശ്രയിക്കരുത്. കരിക്കിന് പട്ടുന്നവയോടൊപ്പം എണ്ണ കൂടുതല്‍ ഉള്ളവയും വക്കണം. കരിക്കിന്റെ വില പോയാലും കയര്‍ എടുക്കേണ്ടി വരരുത്. നല്ല ഇനം തെങ്ങില്‍ തൈകള്‍ക്ക് അതുപോലെ വിലയും ഉണ്ട്. എങ്കിലും ഇന്ന് പല സ്വകാര്യ സ്ഥാപനങ്ങളും നല്ല ഉല്പാദനം ഉള്ള തെങ്ങില്‍ തൈകള്‍ ഉണ്ടാക്കുന്നുണ്ട്. വിശദമായി അവകാശങ്ങള്‍ ശരിയാണോ എന്നറിഞ്ഞേ വാങ്ങാവൂ. വിളവെടുപ്പ് തൈകളെയും മണ്ണിനെയും പരിചരണത്തെയും ആശ്രയിച്ചാണ്.അതുപോലെ തന്നെ മുതലിറക്കുന്നതും.
ചോദ്യം..ഗ്രോ ബാഗ് നിറയ്ക്കല്‍ , വള പ്രയോഗം വിശധീകരിക്കാമോ?
മറുപടി..പോട്ടിംഗ് മിക്സ്‌ചര് എന്നാ പേരില്‍ നാം അറിയുന്ന രണ്ടു മണ്ണ് ഒരു മണല്‍ ഒരു ചാണകം എന്നാ അളവ് എപ്പോഴും ശരി ആകണം എന്നില്ല. അത് മണ്ണിലെ ചെളിയുടെ അളവിനെ ആശ്രയിച്ചാണ് നോക്കേണ്ടത്. ബാഗിലോ ചട്ടിയിലോ മിശ്രിതം നിറക്കുമ്പോള്‍ അതില്‍ വെള്ളം കെട്ടി നില്‍ക്കരുത് എന്നത് പ്രധാനം. ചെളി കട്ടി ഉള്ളതാണെങ്കില്‍ തരി കൂടുതല്‍ ഉള്ള മണല്‍ കൂടുതല്‍ ചേര്‍ക്കണം. പക്ഷെ ഹ്യൂമസ് (അഴുകിയ ജൈവാംശം) കൂടുതല്‍ ചെര്‍ക്കമെങ്കില്‍ നീര്‍ വാര്‍ച്ച ഉണ്ടാകും വളവും . ഒരു പരീക്ഷണത്തിലൂടെ അത് കണ്ടെത്താം. ഒരു കണ്ണന്‍ചിരട്ടയില്‍ ഉണ്ടാക്കിയ പോട്ടിംഗ് മിശ്രിതം നന്നായി ഉറപ്പിച്ചു നിറക്കുക. അതില്‍ വെള്ളം ഒഴിക്കുക. വെള്ളം കെട്ടി നില്‍ക്കാതെ അടിയിലെ ദ്വാരത്തിലൂടെ പോകുന്നുണ്ട് എങ്കില്‍ അത് ഉപയോഗിക്കാം. വളപ്രയോഗം - എന്ത് വളവും ഉപയോഗിക്കാം. എങ്കിലും ബാഗുകളില്‍ ഉണ്ടാക്കുന്നവ താല്‍ക്കാലിക വിളകള്‍ ആയിരിക്കുമല്ലോ. അതുകൊണ്ട് പെട്ടന്ന് വളരുകയും വിളവു തരികയും വേണം. ജീവാമൃതം നല്ലതാണ്. കൂടെ കുറച്ചു പഴകിയ കുമ്മായവും ചാരവും കൊടുക്കണം. പൂക്കുന്ന സമയത്ത് രാവിലെ മഞ്ഞ് ഉണ്ടെങ്കില്‍ ഇലകള്‍ നനയുന്ന വിധം വെള്ളംതലിച്ചു മഞ്ഞുവെള്ളം കഴുകി കളയണം. കുറച്ചു ചാരം തുണിയില്‍ കിഴി കെട്ടി തൂവിയാല്‍ കായ പിടുത്തെം കൂടും. മഞ്ഞു വെള്ളം ഇലകളില്‍ ഇരുന്നാല്‍ അതിനു ചെറിയ മധുരം ഉള്ളതിനാല്‍ കീട ബാധ കൂടും.
ചോദ്യം..പ്രിഷിസൻ ഫാമുകളിൽ ജൈവ രീതിയിൽ വളപ്രയോഗം സാധ്യമാണോ...?
മറുപടി..പ്രിസിഷന്‍ ഫാമുകളില്‍ ജൈവ കൃഷി വിഷമം ആണ്. കാരണം ചെടികള്‍ക്ക് വേണ്ടവ മാത്രം വേര്‍തിരിച്ചു കൊടുക്കുന്ന പ്രത്യേകത എളുപ്പം അല്ല. അതില്‍ പരീക്ഷണങ്ങള്‍ നടന്നാലെ പറയാനാകൂ. പക്ഷെ പ്രിസിഷന്‍ ഫാമിങ്ങ് തന്നെ അത്ര വിജയം ആണോ? ഞാന്‍ കണ്ട പ്രിസിഷന്‍ ഫാമുകളിലെല്ലാം ചില വിളകള്‍ മാത്രമേ വിജയിച്ചു എന്ന് കണ്ടിട്ടുള്ളൂ.
ചോദ്യം..സര്‍ , കൊടംപുളി തണലില്ലാത്ത തരിശുഭൂമിയില്‍ നടമോ ,ഞങ്ങള്‍ 5 ഏക്കര്‍ സ്ഥലത്ത് (തരിശ്) കൊടംപുളി നടാന്‍ ഉദ്ദേശിക്കുന്നു ,താങ്കളുടെ വിധക്ത ഉപദേശം പ്രധിക്ഷിക്കുന്നു
മറുപടി..നടാം. ആദ്യ വര്‍ഷങ്ങളില്‍ കുറച്ചു തണല്‍ കൊടുത്താല്‍ മതി.
ചോദ്യം... ജീവാമൃത വളക്കൂട്ടിന്റെ രീതിയും, പൂന്തോട്ട ചെടികളായ റോസിനും മറ്റും ഉപയോഗിക്കുന്ന രീതിയും വിശദമാക്കുമോ.?
മറുപടി..നാടന്‍ പശുവിന്റെ ചാണകം പത്ത് കിലോ, ഗോമൂത്രം 7 to 10 ലിറ്റര്‍, പ്രദേശത്തെ നല്ല മേല്‍മണ്ണ് ഒരു പിടി, പയര്‍ വര്‍ഗത്തില്‍ ഒന്നിന്‍റെ പൊടി 2 കിലോ, ശര്‍ക്കര 2 കിലോ, വെള്ളം 200 ലിറ്റര്‍. ഇവ നന്നായി ഇളക്കി യോജിപ്പിച്ചു, 48 മണിക്കൂര്‍ കഴിഞ്ഞു ഉപയോഗിക്കാം. ദിവസം മൂന്നു - നാല് പ്രാവശ്യം ഇളക്കണം. തണലത്ത് വക്കുക, 7 ദിവസത്തിനകം ഉപയോഗിക്കുക. പൂ ചെടികളില്‍ ഉപയോഗിക്കുമ്പോള്‍ പകുതി വെള്ളം കൂടി കൂട്ടി നേര്‍പ്പിച്ച് ഒഴിക്കുക.
ചോദ്യം.. എന്തു കൊണ്ടാണു ജീവാമൃതം വലത്തോട്ട് മാത്രം ഇളക്കണമെന്ന് പറയുന്നത്..?
മറുപടി....അതില്‍ വലിയ കാര്യം ഒന്നുമില്ല. ചില മത ചിന്തകള്‍ ഉള്ളില്‍ കിടക്കുന്നതിന്റെ പ്രശ്നം. പക്ഷെ ഇങ്ങനെ ഒരു വളക്കൂട്ട് കാണുമ്പോള്‍ അതിന്റെ അടിത്തറ മനസ്സിലാക്കുക. ചാണകവും മൂത്രവും ഏതടവും കൂടുതല്‍ സൂക്ഷ്മ ജീവികളുടെ കേന്ദ്രം ആണ്. പയര്‍ വര്‍ഗത്തിലെ പ്രോട്ടീന്‍ ആണ് ഇവിടെ വേണ്ടത്. കാരണം ഒരു ലാബില്‍ സൂക്ഷ്മ ജീവികളെ പെരുപ്പിക്കാന്‍ ഉപയോഗിക്കുന്ന മീഡിയം പ്രോട്ടീന്‍ ആണ്. പ്രദേശത്തെ മണ്ണ് അവിടെയുള്ള സൂക്ഷ്മ ജീവികളെ കൂടി കിട്ടാന്‍. ശര്‍ക്കര പ്രോട്ടീന്‍ പ്രവര്‍ത്തന വീര്യം കൂട്ടാന്‍. അപ്പോള്‍ ഈ ജീവാമൃതത്തെ നമ്മുടെ അവസ്ഥയില്‍ കൊണ്ടുവന്നലോ! പയറിന് പകരം ചക്ക കുരുവോ മാങ്ങാ അണ്ടിയോ മതി. തനി നാടന്‍ പശു ഇല്ലെങ്കിലും വലിയ പ്രശ്നം ഇല്ല. തനി വിദേശി ആകാതിരുന്നാല്‍ മതി.
ചോദ്യം..അന്ന് മണ്ണുത്തിമീറ്റില്‍ വെച്ച് നാളികേരത്തിന് വിലയിടിവ് വന്നപ്പോള്‍ ഒരു വിപണന തന്ത്രം ആസൂത്രണം ചെയ്തത് പറഞ്ഞിരുന്നു,അത് ഗ്രൂപിന് വേണ്ടി ഒന്ന് പറയാമോ?
മറുപടി..1998 - 99 കാലത്തും തേങ്ങാക്കു ഇതിനേക്കാള്‍ വില ഇടിഞ്ഞിരുന്നു. കച്ചവടക്കാര്‍ വല്ലാതെ വില കുറച്ചു. പരിഹാരം ആയി തേങ്ങയുടെ മൂല്യ വര്‍ധനവ്‌ നടത്തിയാലോ എന്നൊരു ആലോചന. രണ്ടു സ്വന്തക്കാര്‍ കൂടെ ചേരാം എന്നറിയിച്ചു. ഇന്നുള്ള കൊപ്രയും വെളിച്ചെണ്ണയും ഉണക്കളില്‍ വരുന്ന കരിയും പുകയും, കേടാകാതിരിക്കാന്‍ സള്‍ഫര്‍ തുടങ്ങി ഒട്ടേറെ മാലിന്യങ്ങള്‍ ഉണ്ട്. ആട്ടുംപോള്‍ എണ്ണ മിഷ്യനകത് തിളക്കും. ഒരിക്കല്‍ തിളച്ച് എണ്ണയാണ് നമ്മള്‍ കറി വക്കുമ്പോള്‍ വീണ്ടും തിളപ്പിക്കുന്നത്. ഈ എണ്ണ ആണ് ഉപദ്രവം. അതുകൊണ്ട് ഈ തെറ്റുകള്‍ പരിഹരിച്ചു വേണം മൂല്യ വര്‍ധനവ്‌ എന്ന് തീരുമാനിച്ചു. അങ്ങനെ ചൂട് വായു കടത്തി വിട്ടു തേങ്ങ ഉണക്കുന്ന ഒരു ഡ്രയര്‍ സംഘടിപ്പിച്ചു. ഉള്ളില്‍ കൂടി വെള്ളം കടത്തി വിട്ടു തണുപ്പിച്ചു ആട്ടുന്ന ഒരു Expeller കൂടി കണ്ടെത്തി. ഓരോ ദിവസവും മാര്‍ക്കറ്റ് വില കണക്കാക്കി ഞങ്ങള്‍ തെങ്ങ എടുക്കുന്ന വില ഫാക്ടറിയുടെ മുന്‍പില്‍ എഴുതി വക്കും ആ വിലക്ക് തെങ്ങ അവിടെ എടുക്കും. കര്‍ഷകര്‍ക്ക് നേരിട്ട് കൊണ്ടുവരാം. അതോടെ ഞങ്ങളുടെ പഞ്ചായത്തില്‍ തേങ്ങക്ക് ഒരു വില തീരുമാനം ആയി. ഞങ്ങള്‍ കുറിക്കുന്ന വിലയില്‍ കുറച്ചു കച്ചവടക്കാര്‍ക്ക് തെങ്ങ കിട്ടില്ല എന്ന് വന്നു. മാര്‍ക്കറ്റില്‍ നല്ല ഒരു എണ്ണയും ഇറക്കി. ഒരു പരസ്യവും ഇല്ലാതെ ഞങ്ങള്‍ മാര്‍ക്കറ്റ് പിടിച്ചു. ഒരിക്കല്‍ വാങ്ങുന്നവര്‍ പിന്നെ വേറെ എണ്ണ മേടിക്കില്ല. പേര് ഗ്രീന്‍ വാലി കൊക്കോനട്ട് ഓയില്‍ .
ചോദ്യം..വിദേശി മന്നിരകലെകൊണ്ടുള്ള മണ്ണിരകമ്പോസ്റ്റ് മണ്ണിന്റെ ഊഷരത വര്‍ധിപ്പിക്കും,ഗുണത്തെക്കാള്‍ ദോഷം എന്ന് കണ്ടു,തങ്ങളുടെ അനുഭവം എന്താണ്
മറുപടി.. വിദേശ മണ്ണിരകള്‍ പകുതി അഴുകിയവ പോലും തിന്നുന്നവ ആണ്. നമ്മുടെ മണ്ണിര പൂര്‍ണ്ണമായും അഴുകിയവ ആണ് തിന്നുന്നത്. അപ്പോള്‍ ആ അഴുകിയവയുടെ വളക്കൂറു പത്ത് ഇരട്ടിയാക്കി അവ വിസര്‍ജിക്കും. വിദേശിക്ക് ആ കഴിവില്ല. മാത്രമല്ല അവ ഇവിടെ സ്വാഭാവികമായി പെരുകിയാല്‍ നമ്മുടെ മണ്ണിലെ എന്തൊക്കെ സൂഷ്മ ജീവികള്‍ ഇല്ലാതാകും എന്ന് അറിയില്ല. തിലോപ്പിയ മീന്‍ പെരുകിയത് ഉദാഹരണം. കണ്ണന്‍ ഉള്‍പ്പടെ പല മീനുകളും നമ്മുടെ കുളങ്ങളില്‍ കാണാന്‍ ഇല്ലാതായി.
ചോദ്യം..ഈ മണ്ണിര കമ്പോസ്റ്റ് ഉണ്ടാക്കുന്ന വിദ്യ എങ്ങിനെയാ. ?
മറുപടി...ചെറിയ തോതില്‍ ആണെങ്കില്‍ ഒരു മണ്‍ പാതരം സംഘടിപ്പിക്കുക. അടിയിലും വശങ്ങളിലും കുറച്ചു സുക്ഷിരങ്ങള്‍ ഇടുക. അവ അടഞ്ഞു പോകാതിരിക്കാന്‍ ഓരോ ഓടിന്റെ കഷണങ്ങള്‍ ദ്വാരങ്ങളുടെ മുന്‍പില്‍ ചാരി വക്കുക. അടിയില്‍ കുറച്ചു ചാണകം ഇടുക. അതിനു മുകളില്‍ കുറച്ചു മണ്ണ്. മണ്ണിരകളെ ഇതില്‍ നിക്ഷേപിക്കുക. അടുക്കള വശത്ത് നനവുള്ള ഇടങ്ങളില്‍ മണ്ണ് ഇളക്കിയാല്‍ നമ്മുടെ നല്ല മണ്ണിരകളെ കിട്ടും. രണ്ടു ദിവസം അനക്കാതെ വക്കുക. മണ്ണിര മുകളില്‍ കുരുപ്പ ഇടാന്‍ തുടങ്ങിയാല്‍ ഒരു അടുക്ക് ജൈവ പദാര്‍ഥങ്ങള്‍ ഇടുക. ഈര്‍പ്പത്തിന് മാത്രം നനവ്‌ കൊടുക്കുക. ജൈവ പദാര്‍ഥങ്ങള്‍ ഇട്ടു കൊണ്ടിരിക്കുക. പത്രം നിറഞ്ഞാല്‍ അടുത്തതില്‍ ഇത് തുടങ്ങാം. പത്രം ഒരു വല കൊണ്ട് മൂടിയിരിക്കണം അല്ലെങ്കില്‍ എലി കയറി മണ്ണിരകളെ തിന്നും. അടിയില്‍ ഒരു പാത്രത്തില്‍ വെള്ളം വച്ചു അതില്‍ ഒരു ഇഷ്ട്ടികയോ മറ്റോ വച്ചു വേണം പത്രം വക്കാന്‍. അത് ഉറുമ്പ്‌ കയറാതിരിക്കാന്‍. ഇത് പത്രത്തിനു പകരം ഒരു ടാങ്ക് ആണെങ്കില്‍ വിശാലം ആയി ഉണ്ടാക്കാം. പക്ഷെ എനിക്ക് ഒരു സംശയം. എന്തിനാ ഈ മണ്ണിരകളെ പിടിച്ചു ടാങ്കില്‍ ആക്കി ഇത്ര പണിപ്പെടുന്നെ? വെറുതെ കമ്പോസ്റ്റ്‌ ആക്കി പറമ്പില്‍ ഇട്ടാല്‍ പോരെ, രാസ വസ്ത്തുക്കള്‍ ഇട്ടു പറമ്പിലെ മണ്ണിരയെ കൊല്ലാതിരുന്നാല്‍ ആ കമ്പോസ്റ്റ്‌ അവര്‍ തിന്നു നല്ല വളം ആക്കുമല്ലോ. ഞാന്‍ അതുകൊണ്ട് എന്റെ മണ്ണിര കമ്പോസ്റ്റ്‌ ടാങ്ക് പൊളിച്ചു കളഞ്ഞു. ഇപ്പോള്‍ പറമ്പ് മുഴുവന്‍ മണ്ണിര ഉണ്ട്. പിന്നെ എന്തിനാ അവയെ പിടിച്ചു ടാങ്കില്‍ ആക്കുന്നത്. വിഷം അടിച്ചു കൊല്ലാതിരുന്നാല്‍ അവ മണ്ണില്‍ തന്നെ പെരുകും. അവക്ക് തിന്നാന്‍ വേണ്ട ജൈവാംശം മണ്ണില്‍ ചേര്‍ത്താല്‍ മതി..
ചോദ്യം..>>അവക്ക് തിന്നാന്‍ വേണ്ട ജൈവാംശം മണ്ണില്‍ ചേര്‍ത്താല്‍ മതി.<<ഈ ജൈവാംശം എങ്ങിയാണ്‌ ഉണ്ടാക്കേണ്ടത് ?
മറുപടി..മണ്ണില്‍ അഴുകിച്ചേരുന്ന എല്ലാം ജൈവ വസ്ത്തുക്കള്‍ ആണ്. ചകിരി ചോര്‍, മരമില്‍ വേസ്റ്റ് ചപ്പുചവറുകള്‍ എല്ലാം. കൂടാതെ വെട്ടി മണ്ണില്‍ ചേര്‍ക്കാവുന്ന, പെട്ടന്ന് വളരുന്ന വട്ട, ശീമക്കൊന്ന മുതലായവ പറമ്പിന്റെ അതിരുകളില്‍ വച്ചു പിടിപ്പിച്ചും ആവശ്യത്തിന് ജൈവാംശം ഉണ്ടാക്കാം. ഇന്ന് തൊഴിലുരപ്പിന്റെ പേരില്‍ വഴിയരികില്‍ വെട്ടി കളയുന്നവ കൃഷിയിടത്തില്‍ എത്തിക്കാന്‍ കഴിഞ്ഞാല്‍ അത് തന്നെ ധാരാളം.
ചോദ്യം...    ജീവാമൃതത്തിൽ ശർക്കര അവശ്യ ഘടകം ആണോ..? ചക്കപ്പഴം പോലെയുള്ള വസ്തുക്കള ഉപയോഗിക്കാം എന്ന് ഒരു കർഷകന്റെ അനുഭവ കുറിപ്പുകൾ വായിച്ചപ്പോൾ ഉണ്ടായ സംശയം ആണ്??
മറുപടി..ഇത്തരം വളക്കൂട്ടുകളുടെ ഉള്ളിലെക്കൊന്നു കടന്നു നോക്കൂ. ജീവാമൃതം വളം അല്ല. മണ്ണിലെ ജൈവാംശത്തെ വിഘടിപ്പിച്ചു ചെടികളുടെ ആവശ്യത്തിനുള്ള മൂലകങ്ങള്‍ ആക്കി മാറ്റാന്‍ വേണ്ട സൂക്ഷ്മ ജീവികളെ വളര്‍ത്തി എടുത്ത അവയുടെ സംപുഷ്ട്ടീകരണം ഉള്ള ഒരു മിശ്രിതം ആണ്. നമ്മള്‍ പരീക്ഷണ ശാലകളില്‍ സൂക്ഷ്മ ജീവികളെ വളര്‍ത്തുന്ന മീഡിയം പ്രോടീന്‍ ആണ്. അതിനു വേഗത കൂട്ടാന്‍ ഗ്ലൂക്കോസ് ഉപയോഗിക്കുന്നു. ഇത് കൃഷിയിടത്തിലേക്ക് മാറ്റിയാല്‍ പ്രോട്ടീന്‍ കിട്ടാന്‍ പയറുപൊടി, ഗ്ലൂക്കൊസ്സിനു ശര്‍ക്കര, സൂക്ഷ്മ ജീവികള്‍ക്കായി ചാണകവും മൂത്രവും, പ്രദേശത്തെ സൂക്ഷ്മ ജീവികളെ കൂടി ഉള്‍പെടുത്താന്‍ പ്രദേശത്തെ ഒരു പിടി മണ്ണ്. അപ്പോള്‍ പ്രോട്ടീന്‍ കിട്ടാന്‍ പയറുപൊടി തന്നെ വേണം എന്നില്ല, ചക്കകുരു മാങ്ങാ അണ്ടി തുടങ്ങി ചെലവ് കുറഞ്ഞ പ്രോട്ടീന്‍ ധാരാളം ഉള്ള എന്തും ഉപയോഗിക്കാം. അതുപോലെ മടുരത്ത്തിനു ശര്ക്കരക്ക് പകരം ചക്ക പഴം തുടങ്ങിയവയും. അപ്പോഴേ അത് സീറോ ബഡ്ജറ്റ്‌ ആകൂ.
ചോദ്യം..ജീവാമൃതം പഴകുന്തോറും അതിന്റെ effect കൂടുമോ അതോ കുറയുമോ..?
മറുപടി..   ജീവാമൃതം പോലുള്ള വളക്കൂട്ടുകളില്‍ സൂക്ഷ്മ ജീവികള്‍ പെരുകി അത് സാന്ദ്രം ആയാല്‍ അവ സ്വയം നശിക്കാന്‍ തുടങ്ങും, കാരണം അവക്ക് ജീവിക്കാന്‍ വേണ്ട ഭക്ഷണം തീരും. അതുകൊണ്ട് ഉണ്ടാക്കി രണ്ടു ദിവസം കഴിഞ്ഞാല്‍ ആറോ ഏഴോ ദിവസത്തിനകം ഉപയോഗിക്കുന്നതാണ് നല്ലത്.
ചോദ്യം..ഒട്ടു മരത്തിന്റെ തയ്കൾ മാതൃ വൃക്ഷത്തിന്റെ ഫലം തരുമോ...?
മറുപടി.  തരും. പക്ഷെ എടുത്ത ഒട്ടു കണ്ണിന്റെ കരുത്ത്, എടുത്ത സ്ഥലം ഒക്കെ പ്രധാനം ആണ്. വശങ്ങളിലുള്ള ശിഖിരങ്ങളില്‍ നിന്ന് ഒട്ടു കണ്ണ് എടുത്താല്‍ വളര്‍ച്ചയും ഉല്പാദനവും കുറവായിരിക്കും. അതുകൊണ്ടാണ് വിശ്വസിക്കാവുന്ന നര്‍സറികളില്‍ നിന്നെ തൈകല്‍ വാങ്ങാവൂ എന്ന് പറയുന്നത്.




കടപ്പാട്..കൃഷിഗ്രൂപ്പിലെ സ്നേഹസമ്പന്നരായ അംഗങ്ങളോടും ചോദ്യങ്ങൾക്ക് ക്ഷമയോടെ ഉത്തരം പറയാൻ സന്മനസ്സ് കാണിച്ച ശ്രീ ടോണിതോമസിനോടും..



by navas shamsudeen. 2 Comments

ടോണിച്ചായനോട് ചോദിക്കാം.. ഭാഗം 1...

കൃഷി ഗ്രൂപ്പിലെ അംഗങ്ങൾ, ജൈവകർഷകനും, പരിസ്ഥിതി പ്രവർത്തകനുമായ ശ്രീ ടോണി തോമസിനോട് ചോദിച്ച ചോദ്യങ്ങളും അവയ്ക്ക് അദ്ദേഹം നൽകിയ മറുപടികളും..


ചോദ്യം..സർ ...ഏത് വർഷം മുതലാണ് ജൈവകൃഷിയിലേക്കു വരുന്നത് ? രാസവള കൃഷിയിൽ നിന്നും ജൈവ കൃഷിയിലേക്കുള്ള ഒരു മാറ്റത്തിലാണ് ഇന്ന് നമ്മുടെ നാട്ടിലെ കർഷകർ ഇത് എത്ര മാത്രം ഗുണം ചെയ്യും ..താങ്കളുടെ വിലയേറിയ നിർദ്ദേശം പ്രതീക്ഷിക്കുന്നു.

മറുപടി.. 1994ല്‍ ആണ് ഞാന്‍ ജൈവ കൃഷിയിലേക്ക് മാറിയത്. അതിനും ഒരു പതിനഞ്ചു വര്ഷം മുന്‍പ് കൃഷിയില്‍ ഇറങ്ങി. ശാസ്ത്രീയമായി രാസവളം ഇട്ടു കൃഷി ചെയ്തു. നല്ല വിളവു കിട്ടി. പക്ഷെ നാലഞ്ചു കൊല്ലം കഴിഞ്ഞപ്പോള്‍ വിളവു കുറയാന്‍ തുടങ്ങി, കേടു കൂടുന്നു. എവിടെയോ തെറ്റ് പറ്റി എന്ന് മനസ്സിലായി. പക്ഷെ എന്താണെന്ന് പിടികിട്ടിയില്ല. അന്വേഷണം തുടര്‍ന്ന്. യാദൃശ്ചികമായി ഫുക്കുവോക്കയുടെ One Straw Revolution എന്ന പുസ്തകം കിട്ടി. അതാണ്‌ എന്‍റെ ചിന്തകളെ മാറ്റിയത്. ജൈവ കൃഷിയിലേക്ക് തിരിഞ്ഞു. കുറെ തെറ്റുകള്‍ വരുത്തി. സംശയം ചോദിക്കാനും ആരുമില്ല. പറ്റിയ തെറ്റുകള്‍ തിരുത്തി. ഇപ്പോള്‍ എന്‍റെ കൃഷിയിടം ഏതാണ്ട് സ്വയം പര്യാപ്തം ആയിരിക്കുന്നു. പുറത്തു നിന്ന് കക്ക മാത്രമേ വാങ്ങുന്നുള്ളൂ. കേരളത്തില്‍ കര്‍ഷകന്‍ രക്ഷപ്പെടാന്‍ - നാളെ നമ്മുടെ മക്കള്‍ ആരോഗ്യത്തോടെ ജീവിക്കാന്‍ ജൈവ കൃഷി മാത്രമാണ് പരിഹാരം.

ചോദ്യം.. ഈ അടുത്തയിടെ പ്രചാരം നേടിയ കാര്‍ഷിക രീതി ആണല്ലോ സീറോ ബജറ്റ് സ്പിരിച്വല്‍ ഫാര്‍മിംഗ്. ഈ കൃഷി രീതിയെ കുറിച്ച് എന്താണ് അഭിപ്രായം? എല്ലാ വിളകള്‍ക്കും ഈ രീതി പ്രായോഗികം ആണോ? ആലപ്പുഴ ജില്ലയിലെ താഴ്ന്ന പ്രദേശങ്ങളില്‍ നെല്ല് കൃഷി ചെയ്യാന്‍ ഈ രീതി ഉപയോഗിക്കാമോ?

 മറുപടി : പേര് എന്ത് പാലേക്കര്‍ ഇട്ടു ഇറക്കിയാലും ഇത് പല കര്‍ഷകരും ഇവിടെയും ചെയ്തിരുന്ന കാര്‍ഷിക മുറകള്‍ ആയിരുന്നു. പാലെക്കാരുടെ പേര് കേള്‍ക്കുന്നതിനും പത്തു വര്ഷം മുന്‍പ് ജീവാമൃതം വളക്കൂട്ടു എന്നാ പേരില്‍ ഉപയോഗിച്ച ഒരു കര്‍ഷകന്‍ കായംകുളത്ത് ഉണ്ട്. പേരല്ല പ്രശ്നം. കൃഷി രീതി ആണ്. ഈ രീതിയില്‍ എല്ലാ വളങ്ങളും ഫെര്‍മെന്റ്റ്‌ ചെയ്താണ് ഉപയോഗിക്കുന്നത്. ഫെര്‍മെന്റ്റ്‌ ചെയ്യുന്ന ഏതു വളങ്ങളും മണ്ണിന്റെ അസിടിടി കൂട്ടും. അതുകൊണ്ട് പച്ച കാക്ക കൂടി മണ്ണിനു കൊടുക്കണം. പച്ച കാക്ക കിട്ടില്ലെന്കില്‍ നീട്ടു കാക്ക വെള്ളം തളിച്ച് പോടിയാന്‍ സമയം കൊടുത്തു മൂന്നു നാല് ആഴ്ച കഴിഞ്ഞു ഇടാം. ആലപ്പുഴയിലും ഇത് ചെയ്യാം. എടത്വായില്‍ എന്റെ ഒരു സുഹൃത്ത്‌ വെള്ളം വറ്റിച്ചു കഴിഞ്ഞപ്പോള്‍ അവിടെ ഉണ്ടായിരുന്ന മുള്ളന്‍ പായല്‍ അഴുകിയത്തിനു മുകളില്‍ വിത്ത് വിതച്ചു പോലും നല്ല വിളവു ഉണ്ടാക്കി. അവിടെ ജീവാമൃതം കൊടുത്താല്‍ വിളവു കൂട്ടം. + കുമ്മായം. + കുറച്ചു മീന്‍ അമിനോ വളവും. ( മീന്‍ വളം ഫയല്‍ നോക്കിയാല്‍ കിട്ടും.)

ചോദ്യം..ജൈവ കൃഷി രീതിയില്‍ കീടങ്ങളുടെ നിയന്ത്രണം ഫലപ്രദമാകുന്നില്ല. മഴ അതിനൊരു കാരണമാണോ? ഫലപ്രദമായി കീടനിയന്ത്രണത്തിനുള്ള ഒരു മാര്‍ഗം പറഞ്ഞു തരാമോ ?പാവല്‍, പടവലം,പയര്‍ എന്നിവക്കാണ് പെട്ടെന്ന് വേണ്ടത് ...

മറുപടി..കീടങ്ങള്‍ പ്രശ്നം ആകുന്നതു പല കാരണങ്ങളാലാണ്. മുകളില്‍ ഫലം തരുന്നവ കറുത്ത വാവിന് മുന്‍പ് നടുക. അവയില്‍ പൂക്കള്‍ വെളുത്ത പക്ഷത്തില്‍ ആണ് കൂടുതല്‍ ഉണ്ടാവുക. കീടാക്രമണം കുറയും. കൃഷിയിടങ്ങളില്‍ ഇടയ്ക്കിടയ്ക്ക് മഞ്ഞ പ്ലാസ്റ്റിക്‌ ഷീറ്റിലോ മഞ്ഞ ചാക്കിലോ എണ്ണ പുരട്ടി തൂക്കി ഇടുക. കീടങ്ങള്‍ക്ക് ഇഷ്ടപ്പെട്ട നിറം ആയതിനാല്‍ അതില്‍ പറ്റിപ്പിടിച്ചു നശിക്കും. ചിലന്തി വലകള്‍ നശിപ്പിക്കരുത്. എവിടെയെങ്കിലും കമ്പുകളില്‍ ചിലന്തി വല കണ്ടാല്‍ കെട് വരുത്താതെ കൊണ്ടുവന്നു പച്ചക്കരികള്‍ക്കിടയില്‍ സ്ഥാപിക്കുക. തവളകള്‍ വലുതോ ചെറുതോ കൃഷിയിടത്തില്‍ വളരാന്‍ സഹായിക്കുക. - ഇവ സ്ഥിരം സംരക്ഷകരാണ്‌..., ജമന്തി തുടങ്ങി ശക്തമായി മനം ഉള്ള ചെടികള്‍ കീടങ്ങളെ അകറ്റും. രൂക്ഷമായി കൈപ്പുള്ള - ഉദാ: കാഞ്ഞിരം, ഉഴിഞ്ഞ മുതലായവ - അരച്ച് തളിച്ചാല്‍ മിക്ക കീടങ്ങളും അടുക്കില്ല. നമ്മുടെ ഗ്രൂപ്പിന്റെ ഫയല്‍ നോക്കിയാല്‍ കുറെ കീട നാശ്നികള്‍ അവിടെ ഉണ്ട്.

ചോദ്യം.. ഇന്ന് ജൈവ വളം എന്ന പേരിൽ മാർക്കറ്റിൽ ധാരാളം വളങ്ങൾ ലഭ്യമാണല്ലോ പലതും വ്യാജനാണെന്നാണു അറിയാൻ സാധിച്ചത്. എങ്കിൽ കേരളത്തിൽ വിപണനം നടത്തുന്ന ഗുണമേന്മയുള്ള ജൈവ വള കമ്പനി ഉൽ‌പ്പന്നങ്ങൾ ഉണ്ടോ...?

 മറുപടി: വിശ്വസിക്കാവുന്ന ഒരു വള കമ്പനിയും ഇല്ല. എളുപ്പം നമ്മള്‍ സ്വയം വവളം ഉണ്ടാക്കുക എന്നതാണ്. പറമ്പിലെ കളകളും റോഡരികിലെ (തൊഴിലുറപ്പ് പദ്ധതി വെട്ടി കളയുന്നതുപ്പടെ പറമ്പില്‍ എത്തിച്ചു കമ്പോസ്റ്റ്‌ ആക്കുക. അതില്‍ ജീവംരുതാമോ മീന്‍ വളമോ ഒക്കെ ചേര്‍ത്ത് വേണമെങ്കില്‍ വീര്യം കൂട്ടം. അത് ഉപയോഗിക്കാം. മാന് കരുത്ത് ആയിട്ടില്ലെങ്കില്‍ ചകിരി ചോര്‍, മില്‍ വേസ്റ്റ് മുതലായ ഘന വസ്തുക്കള്‍ കൂടി കൊടുക്കുക. അങ്ങനെ വളത്തിന്റെ കാര്യത്തില്‍ സ്വയം പര്യാപ്തം ആകുക.

ചോദ്യം..നട്ടു പന്തലിലേക്ക് പടര്‍ന്നു തുടങ്ങി പൂവും ഉണ്ട്. ഒരു മഞ്ഞ നിറത്തിലുള്ള ജീവിയാണ്. ഇലകള്‍ മുഴുവനും തിന്നുന്നു. വേപ്പെണ്ണ മിശ്രിതം തളിച്ചു. പക്ഷെ മഴയത്ത് ഇലകളില്‍ പിടിക്കുന്നില്ല. ഞാന്‍ ഗ്രോ ബാഗിലാണ്‌ നട്ടിരിക്കുന്നത്. ചെറിയ പുളി ഉറുമ്പുകള്‍ ( കടിക്കാത്തവ )ഉണ്ട് അത് കീടങ്ങളെ നശിപ്പിക്കും എന്ന് കേള്‍ക്കുന്നുണ്ടല്ലോ ? പയറില്‍ ഒക്കെ ധാരാളം ഉണ്ട് ഈ ഉറുമ്പ്. 

മറുപടി: കടിക്കാത്ത ഉറുമ്പ്‌ പ്രശ്നക്കാരന്‍ ആണ്. അത് ഒരു കീടത്തെ പയറില്‍ വളര്‍തും.അവ പയറിന്റെ നീര് കുടിക്കും. പയര്‍ മുരടിച്ചു പോകും. കടിക്കുന്ന പുളിഉറുമ്പിനെ കയറ്റി വിടുക. മഞ്ഞ കെണി വെക്കുക. ജമന്തി മുതലായ ചെടികള്‍ ഇടയ്ക്കു വളര്‍ത്തുക. മിക്കവാറും പ്രശ്നങ്ങള്‍ തീരും.

ചോദ്യം.. ജീവാമൃതം ഉണ്ടാക്കാൻ നാടൻ പശുവിന്റെ മൂത്രം വേണമല്ലോ, എന്റെ ഒരു സംശയം ചോദിക്കട്ടെ?
ചോദ്യം: 1. എങ്ങിനെയാണ് പശുവിന്റെ മൂത്രം ശേഖരിക്കുന്നത്? തൊഴുത്തിൽ നിലത്ത് ഒഴിച്ച മൂത്രം ചാണക കുഴിയിലേക്കാണ് പോകുന്നത്.
ചോദ്യം: 2. ജൈവ വളമായി ഉപയോഗിക്കുന്ന കോഴികാഷ്ഠം ചൂട് കുടുതലാണ്.. അതുകൊണ്ട് ചെടിക്ക് നേരിട്ട് ചേർക്കരുത് എന്ന് പറഞ്ഞു കേട്ടിട്ടുണ്ട്. എന്തൊക്കെ കാര്യങ്ങളാണ്, കോഴി വളം ചേർക്കുമ്പോൾ ശ്രദ്ധിക്കേണ്ടത്?


മറുപടി..   ഒന്നുകില്‍ തൊഴുത്തില്‍ നിന്നും ചാണകവും മൂത്രവും വേര്‍തിരിച്ചു കിട്ടാന്‍ തൊഴുത്തിന്റെ താഴെ അരികിലായി ഒരു ചാല്‍ നിര്‍മിക്കുക. അത് ഒരു ടാങ്കിലേക്ക് ആക്കിയാല്‍ മൂത്രം എളുപ്പത്തില്‍ പിടിച്ചെടുക്കാം. മൂത്രം മാത്രമല്ല തൊഴുത്തു കഴുകുന്ന വെള്ളം വേറെ എടുത്തു ചെടികള്‍ക്ക് ഉപയോഗിക്കാം. അത് പറ്റില്ല എങ്കില്‍ രാവിലെ പശു എഴുന്നേല്‍ക്കുമ്പോള്‍ ഒരു ബക്കറ്റുമായി തൊഴുത്തില്‍ എത്തുക. പശുക്കള്‍ എഴുന്നെട്ടാല്‍ പത്ത് മിനിട്ടിനകം മൂത്രം ഒഴിക്കും. ആ സമയം ബക്കറ്റ് പിന്നില്‍ പിടിച്ചാല്‍ മൂത്രം പിടിച്ചെടുക്കാം.


തുടരും..
കടപ്പാട്..കൃഷിഗ്രൂപ്പിലെ സ്നേഹസമ്പന്നരായ അംഗങ്ങളോടും ചോദ്യങ്ങൾക്ക് ക്ഷമയോടെ ഉത്തരം പറയാൻ സന്മനസ്സ് കാണിച്ച ശ്രീ ടോണിതോമസിനോടും..

by navas shamsudeen. 9 Comments

ശർക്കരകെണി

 കർഷകർക്കും, വീട്ടാവശ്യത്തിനല്പം പച്ചക്കറി കൃഷി ചെയ്യുന്നവർക്കുമൊക്കെ വളരെ ശല്യമുണ്ടാക്കുന്നതാണു കായീച്ച. പാവൽ, പടവലം എന്നീ വിളകളുടെ മുഖ്യ ശത്രു. ഇവയെ വളരെ എളുപ്പത്തിൽ നിയന്ത്രിക്കുവാനായി പണ്ടു മുതൽക്കേ ഉപയോഗിച്ച് വരുന്ന ഒരുപാധിയാണു ശർക്കരകെണി. ഇത് തയ്യാറാക്കുവാനായി, പഴം അല്പം ശർക്കര ചേർത്ത് ഞെരടിയ ശേഷം അതിലേക്ക് അല്പം മാലത്തിയോൺ അല്ലെങ്കിൽ ഫുരുഡാൻ ചേർക്കുക. ഈ മിശ്രിതം അല്പം വെള്ളത്തിൽ കലക്കി ചിരട്ടകളിലാക്കി തോട്ടത്തിന്റെ വിവിധഭാഗങ്ങളിലായി കെട്ടിത്തൂക്കിയിടുക. ഇതിലൂടെ കായീച്ചയെ വളരെ ഫലപ്രദമായി നിയന്ത്രിക്കാൻ കഴിയും.

ഡങ്കിപ്പനിയോ..പേടിക്കണ്ട.

ഒരു കാലത്ത് വീട്ടു വളപ്പുകളിലെ നിറസാന്നിദ്ധ്യമായിരുന്നു പപ്പായ മരം. പപ്പായ മരത്തിന്റെ ഗുണഗണങ്ങൾ തിരിച്ചറിയാതെ മലയാളികൾ നിഷ്കരുണം അതിനെ ഒഴിവാക്കിക്കൊണ്ടിരിക്കുകയാണു. ഡങ്കി പനി മൂലം കഷ്ടപ്പെടുന്നവർക്ക് ആശ്വാസം പകരുന്ന വാർത്തയാണു പപ്പായയിൽ നിന്നു രോഗമുക്തി എന്നത്. ഡങ്കി പനി പിടിപെട്ടവർക്ക് പപ്പായ ഇല വൃത്തിയായി കഴുകി അല്പം വെള്ളം ചേർത്ത് മിക്സിയിൽ അടിച്ച് ജ്യൂസ് ആക്കി ദിവസം മൂന്ന് ഗ്ലാസ് വീതം കൊടുത്താൽ വളരെ പെട്ടെന്ന് രോഗ ശാന്തി കിട്ടും.


കൊളസ്റ്റ്രോളിനെ നിയന്ത്രിക്കാം..

5 കറിവേപ്പില ഇതൾ, 5 വെളുത്തുള്ളി അല്ലി, 5 കുരുമുളക്, അതിനു സമം ഇഞ്ചി എന്നിവ അരച്ച് മോരിൽ ചേർത്ത് 5 ദിവസം വെറും വയറ്റിൽ കഴിക്കുക. പിന്നെ കൊളസ്ട്രോൾ 2 - 3 മാസം പേടിച്ചു മാറി നില്ക്കും .. വീണ്ടും ഇത് പോലെ അഞ്ചു ദിവസം ...

Posted in by navas shamsudeen. 5 Comments

തൊഴിലുറപ്പിന്റെ നന്മകൾ..



പുതുതലമുറ കൃഷി ലാഭകരമല്ല എന്ന് വാദിച്ചു കൊണ്ട് പുറംതിരിഞ്ഞു നിൽക്കുമ്പോൾ ജന്മനാ രക്തത്തിൽ അലിഞ്ഞു ചേർന്ന കൃഷിസ്നേഹം ഈ അറുപതാം വയസ്സിലും ഊട്ടിയുറപ്പിക്കുകയാണ് ആലപ്പുഴ ജില്ലയിലെ മധുവെന്ന കർഷകൻ. സർക്കാർ പദ്ധതികളായ സാക്ഷരതാ മിഷൻ, ശുചിത്വ മിഷൻ, ജനകീയാസൂത്രണം, കിലയുടെ ജില്ലാതല റിസോഴ്സ് ഗ്രൂപ്പ്, തൊഴിലുറപ്പ് പദ്ധതി എന്നിവയുമായി ബന്ധപ്പെട്ട് ശ്രദ്ധേയമായ പ്രവർത്തനങ്ങൾ കാഴ്ചവെച്ചിട്ടുണ്ട് ശ്രീ മധു. തൊഴിലുറപ്പ് പദ്ധതിയുമായി ബന്ധപ്പെട്ട് പ്രവർത്തിക്കവേ, വളരെയധികം വിമർശനം നേരിടുന്ന ഒന്നാണു ഈ പദ്ധതിയെന്ന് അദ്ദേഹം മനസ്സിലാക്കി. അതിനു പ്രധാന കാരണം ലക്ഷ്യബോധമില്ലാതെ വഴിയരുകിലെ പൊന്തക്കാടുകൾ വെട്ടിമാറ്റലും ഓട വൃത്തിയാക്കലും മാത്രമാണ് ഈ പദ്ധതിയുടെ കീഴിൽ വരികയെന്ന് ധരിച്ച് വശായ ഒരു കൂട്ടം ഉദ്യോഗസ്ഥരും തൊഴിലാളികളുമെന്ന് തിരിച്ചറിഞ്ഞു. ഈ ജനശക്തിയെ പ്രയോജനപ്രദമായ രീതിയിൽ എങ്ങനെ വിനിയോഗിക്കാം എന്ന ചിന്തയുടെ പരിണത ഫലമാണു അദ്ദേഹത്തിന്റെ രണ്ടരയേക്കറിലെ കൂട്ടുകൃഷി. ശ്രീ മധുവിനെക്കുറിച്ച് കൂടുതൽ മനസ്സിലാക്കാനായി അദ്ദേഹവുമായി നവാസ് ഷംസുദ്ദീൻ നടത്തിയ സംഭാഷണത്തിൽ നിന്ന് കാതലായ ഭാഗങ്ങൾ ഇ-മഷി വായനക്കാർക്കായി ഈ ലക്കം..

"നമസ്കാരം മധുവേട്ടാ…. മധുവേട്ടനെ കുറിച്ച് ഇ-മഷി വായനക്കാർക്ക് കൂടുതലറിയാൻ താത്പര്യമുണ്ട്."

"നമസ്കാരം ശ്രീ നവാസ്, ഞാൻ ഒരു ഇടത്തരം കർഷക കുടുംബാംഗം ആണ്. കുട്ടനാട്ടുകാരനായ അച്ഛനും, ചേർത്തലക്കാരിയായ അമ്മയും. കുട്ടനാട്ടിലും, പാണാവള്ളിയിലും നെൽകൃഷിയുണ്ടായിരുന്നു അച്ഛന്. അതുകൊണ്ട് തന്നെ വളരെ ചെറുപ്പത്തിലേ കൃഷികാര്യങ്ങളുമായി അടുത്ത് ബന്ധപ്പെടാൻ സാധിച്ചു. അന്നൊക്കെ കൃഷിയെന്നത് ലാഭത്തേക്കാളുപരി ഒരു ഹരം തന്നെയായിരുന്നു.  72 ല് സര്ക്കാര് ഉദ്യോഗം. 2006 ല് അടുത്തൂണ്.  ഇപ്പോള് വയസ്സ് 61. 2007 ല് വീണ്ടും പാടത്തേയ്ക്ക് ഇറങ്ങി. തോൽവി നുണഞ്ഞു. നിരന്തരം തോറ്റു മടങ്ങി. ഇപ്പോഴുള്ള സാമൂഹ്യ പരിതസ്ഥിതിയില് വലിയ പണംമുടക്ക് ഇല്ലാതെ വെറുതേ അദ്ധ്വാനം മാത്രം കൊണ്ട് കാര്യമില്ല എന്ന് തിരിച്ചറിയുന്നു.  ഭാര്യ അദ്ധ്യാപിക. മക്കള് 2 പേര്. അവര്ക്ക് ആര്ക്കും കൃഷിയോട് വെറുപ്പില്ല എന്നേയുള്ളു.  താത്പര്യം പോര. എങ്കിലും ഞങ്ങളുടെ ആവശ്യത്തിനുള്ള കുറച്ചു പച്ചക്കറികള് എപ്പോഴും വീട്ടു വളപ്പില് കിട്ടുന്നു."



"സംസ്ഥാന സർക്കാർ വക ജനകീയാസൂത്രണം പോലെയുള്ള പദ്ധതികളുമായി ബന്ധപ്പെട്ടു പ്രവർത്തിച്ചിട്ടുണ്ടെന്നറിയാൻ കഴിഞ്ഞു, വേറെയെന്തൊക്കെയാണീ മേഖലയിലുള്ള അനുഭവപരിചയം?"

"അതേ, സർക്കാരിന്റെ ചില പദ്ധതികളുമായി ബന്ധപ്പെട്ട് പ്രവർത്തിക്കാനും, കഴിയുന്നത്ര അവബോധനം സുഹൃത്തുക്കളിലും, തദ്ദേശവാസികളിലും സൃഷ്ടിക്കാനും ആവുന്നത്ര പരിശ്രമിച്ചിട്ടുണ്ട്. മുഖ്യമായും, സര്ക്കാരിന്റെ സാക്ഷരതാ പരിപാടിയുടെ തുടക്കം മുതലേ സാമൂഹ്യ പ്രവര്ത്തന രംഗത്തുണ്ട്.  ജനകീയാസൂത്രണം, 9,10,11,12 പദ്ധതികളുടെ ജില്ല-ബ്ലോക്ക്-ഗ്രാമ പഞ്ചായത്ത് തല പരിപാടികള്, കിലയുടെ ജില്ലാതല റിസോഴ്സ് ഗ്രൂപ്പ്, തൊഴിലുറപ്പ് പദ്ധതി, ശുചിത്വ മിഷൻ പരിപാടികള് തുടങ്ങി വിവിധ പ്രവര്ത്തനങ്ങളിലും ബന്ധപ്പെട്ടു പ്രവര്ത്തിച്ചിട്ടുണ്ട്."

"ഇപ്പോഴുള്ള തൊഴിലുറപ്പു പദ്ധതി ക്രിയാത്മകമായ രീതിയിൽ മധുവേട്ടൻ കൈകാര്യം ചെയ്തു എന്നു സന്തോഷത്തോടെ മനസ്സിലാക്കി. വളരെയേറെ പരാതി കേട്ടുകൊണ്ടിരിക്കുന്ന തൊഴിലുറപ്പ് പദ്ധതിയിൽ മധുവേട്ടനെ ആകർഷിച്ച ഘടകമെന്തായിരുന്നു?"

"ഞങ്ങളുടെത് ആലപ്പുഴ ജില്ല, തൈക്കാട്ടുശ്ശേരി ബ്ലോക്ക്.  ഈ ബ്ലോക്കിലെ മഹാത്മാ ഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയുടെ വിവിധ ഘട്ടങ്ങളില് പ്രത്യേകിച്ച് അതിന്റെ ജില്ലാ തല ക്ലാസുകളിലും റിസോഴ്സ് ഗ്രൂപ്പിലും നേരത്തേ മുതല് ഞാൻ പങ്കെടുത്തിരുന്നു. അവിടെ ഉണ്ടാകാറുള്ള ചർച്ചകളും ക്ലാസ്സുകളുമാണ് ഇതിന് എന്നെ പ്രേരിപ്പിച്ചത്. തൊഴിലുറപ്പ് ഗ്രൂപ്പിലെ മേറ്റ്മാര്ക്ക് ക്ലാസ് എടുക്കുമ്പോൾ എന്നെ കൂടുതൽ അലട്ടിയത് ഈ വിഭാഗത്തെക്കുറിച്ചുള്ള അവമതിപ്പുകളാണ്. തൊഴിലിരിപ്പ് കാരെന്നും, തൊഴിലുറക്കക്കാരെന്നും തുടങ്ങി ഒത്തിരി വിശേഷണങ്ങള്! വര്ക്കിംഗ് ക്ലാസ്സ് എന്ന പദവി ഇപ്പോള് അദ്ധ്യാപകരും മിനിസ്റ്റീരിയല് ജീവനക്കാരും ഒക്കെ കൊണ്ടുപോയി. കുറേക്കൂടി വ്യക്തമാക്കിയാല് മണ്ണില് പണിയെടുക്കുന്നവര്ക്ക് ആ പദവി അന്യമായി. ഏതു തൊഴിലും ശ്രേഷ്ഠമാണെന്ന കാഴ്ചപ്പാടിന്റെ കുറവും നിലനിന്നിരുന്നു. അതവിടെ നിൽക്കട്ടെ, നമുക്കു തൊഴിലുറപ്പുകാരിലേക്ക് വരാം. അവര് പച്ചയും കാടും വെട്ടി തരംതിരിവില്ലാതെ ജൈവ നാശം വരുത്തുന്നു, പണിയെടുക്കില്ല, അവര്ക്ക് കൊടുക്കുന്ന കാശ് പാഴാണ്.. പണിയെടുക്കാതെ ഒപ്പിട്ട് പോകുന്നവര് ഉണ്ട്..,അത്തരം വരുമാനം വിവിധ തലങ്ങളില് വീതം വയ്ക്കുന്നു, അങ്ങനെ നീളും ആ പട്ടിക. ഈ പരാതികൾക്കിടയിലും അവർ മണ്ണിൽ പണിയെടുക്കുന്നു എന്നൊരു പൊതുവായ കാര്യമുണ്ടല്ലോ. അതായിരുന്നു എന്നെ ആകർഷിച്ച ഘടകം."

"ഇത്തരമൊരു ആശയത്തിലേക്ക് എത്തുന്നത് മാത്രമല്ലല്ലോ പ്രശ്നം, നമ്മുടെ നാടിന്റെ ഇപ്പോഴത്തെ സാഹചര്യത്തിൽ ഇതെങ്ങനെ പ്രായോഗികമാക്കാൻ കഴിഞ്ഞു.?"

"ഇവരുടെ ജോലികൾ ഉത്പാദനപരമാക്കുവാൻ എന്താണു വഴിയെന്നാലോചിച്ചിരിക്കുമ്പോഴാണു നീർത്തട സംരക്ഷണത്തിനുണ്ടായിരുന്ന പഴയ പത്ത് ഇനം ജോലികളും കൂടാതെ ഒരു മുപ്പതിന ജോലികളും കൂടി തൊഴിലുറപ്പ് മുഖേന ചെയ്യാം എന്ന സ്ഥിതി വന്നത്. സമാന്തരമായി ഏതോ ഭാഗ്യത്തിനു കേരള സർക്കാർ വക, തരിശു നിലം കൃഷിക്കുപയോഗിക്കുന്നതിനുള്ള പദ്ധതിയും നിലനിന്നിരുന്നു. നമ്മുടെ റ്റി. എസ്. വിശ്വൻ സർ ഉൾപ്പെടെ ഞങ്ങളുടെ റിസോഴ്സ് ഗ്രൂപ്പിൽപ്പെട്ട കൃഷി സ്നേഹികളായ ജില്ലാ റിസോഴ്സ് അംഗങ്ങളുടെ ചർച്ചകളിൽ, ഏതാണ്ടിത്തരമൊരു ആശയം ഉരുത്തിരിയുകയായിരുന്നു."
"വ്യക്തത ഇല്ലായ്കയും, മുൻ മാതൃകകളില്ലായ്കയും, ചുവപ്പ് നാടകളും, സ്ഥലം പാട്ടത്തിനു കൊടുക്കാൻ വൈമനസ്യം കാട്ടുക തുടങ്ങിയ പ്രാദേശിക പ്രശ്നങ്ങളും തുടങ്ങി അനേകം പരിമിതികൾ ഉണ്ടായിരുന്നു. കുറച്ച് പേരെങ്കിലും ഉട്ടോപ്യൻ എന്ന് പറഞ്ഞപ്പോൾ അതൊരു വാശിയായി. പദ്ധതികൾ സംയോജിപ്പിക്കുന്നതിന്റെ സാദ്ധ്യതകൾ ബ്ലോക്ക്-പഞ്ചായത്ത്-കൃഷിഭവൻ തലങ്ങളിലെ നല്ല കൂട്ടുകാരുമായി പങ്കിട്ടു. ആത്മവിശ്വാസം നൽകാൻ അത് സഹായിച്ചു. ആഗ്രഹവും വാശിയും എന്നെ പിന്തുടരുന്നുണ്ടായിരുന്നു. കഴിഞ്ഞ ഒക്ടോബർ മാസത്തിൽ തൈക്കാട്ടുശ്ശേരി ബിഡിഓ ശ്രീ ദിനേശൻ, NREG അക്രഡിറ്റഡ് എഞ്ചിനിയർ ശ്രീ രഘുനാഥപിള്ള, പാണാവള്ളി ഗ്രാമ പഞ്ചായത്ത് ഡിവിഷനിലെ ശ്രീമതി അമ്പിളി, കൃഷി ഓഫീസർ ശ്രീമതി ജിജി തുടങ്ങി നാടിനു വേണ്ടി എന്തെങ്കിലും ചെയ്യണമെന്ന് താത്പര്യമുള്ള ഓഫീസർമാരോട് കാര്യങ്ങൾ പറഞ്ഞു. ആവത് ചെയ്ത് തരാമെന്ന  അവരുടെ പ്രോത്സാഹനവുമുണ്ടായിരുന്നു ഇതിനു പിന്നിൽ..

പ്രായോഗികമായി കൃഷി പരിജ്ഞാനം കുറവുള്ള തൊഴിലുറപ്പ് പദ്ധതിക്കാരെ എങ്ങനെ ഇതിനു സജ്ജമാക്കിയെടുക്കുകയുണ്ടായി?

തൊഴിലുറപ്പ് പദ്ധതിയിലുള്ള ജോലിക്കാരെ സജ്ജരാക്കാൻ അവരിൽ ഒരാളായേ പറ്റൂ.. അതിനായി തൊഴിൽ കാർഡിനപേക്ഷിച്ചു. താമസിയാതെ കിട്ടി. തൊഴിലുറപ്പ് ജോലികളുമായി സാധാരണ എത്താറുള്ള ശ്രീമതി കൈരളിയുമായി കണ്ടു. എന്നെക്കൂടെ മസ്റ്റർ റോളിൽ കൂട്ടുവാൻ ആവശ്യപ്പെട്ടപ്പോൾ അവർക്ക് അതിശയം. ജില്ലാ റിസോഴ്സ് ടീമിൽപ്പെട്ട അദ്ധ്യാപകനായി അവരുടെ മുന്നിൽ എത്താറുള്ള ഞാൻ ഒരു മൺ വെട്ടിയുമായി, എന്നെക്കൂടെ തൊഴിലുറപ്പിൽ ചേർക്കാൻ കൈലിയുമുടുത്ത് ചെന്ന് ആവശ്യപ്പെട്ടപ്പോൾ ഒന്ന് അന്തിച്ചതാണു്. ഏതായാലും നമ്മുടെ ആശയം വിശദമായി അവരുമായി പങ്കു വെച്ചു. അവർവഴിക്കു പഞ്ചായത്തിലും. തുടർന്ന് എസ്റ്റിമേറ്റ് ഉണ്ടാക്കാൻ നെട്ടോട്ടം. സ്ഥലം ഒരു പ്രശ്നമായി, എന്റെ കൈവശം വെറും 85 സെന്റേ ഉള്ളൂ. ഒരു സെറ്റ് തൊഴിലുറപ്പു റ്റീമിനു 12 ഏക്കർ എങ്കിലും ഉണ്ടാകണം. ഇരുപത്തിയെട്ടു പേരുടെ ഗ്രൂപ്പ്, ഇരുപത്തിനാലു ദിവസം ജോലി, ഇതൊക്കെ ഓടി നടന്ന് ഒപ്പിച്ചെടുത്തു. ആദ്യം സാങ്ങ്ഷൻ ലഭിച്ചപ്പോൾ ഡിസംബർ പകുതിയായി.

ഗ്രൂപ്പിന്റെ സംഘടനാ രീതിയെക്കുറിച്ചു കൂടിയൊന്ന് വിശദീകരിച്ചാൽ കൃഷി സ്നേഹികളായ വായനക്കാർക്ക് താത്പര്യം കൂടുമായിരുന്നു.

മൂന്നു കൂടിച്ചേരലുകൾ കഴിഞ്ഞതോടെ തീരുമാനമായി. തൊഴിലുറപ്പിനു് എത്തിയ എല്ലാ തൊഴിലാളികളും ചേർന്ന ഒരു ഗ്രൂപ്പ് ആണു കൃഷിക്കിറങ്ങുന്നത്. കൂലി ഇല്ലാത്ത ദിവസങ്ങളിലും പണിക്കു വരാം. ആദ്യ മുടക്കിനായി ഇരുനൂറു രൂപ വെച്ച് സമാഹരിക്കണം. തൊഴിലുറപ്പു കഴിഞ്ഞാലുള്ള പണി ദിവസങ്ങളിൽ ഹാജർ വെയ്ക്കണം. ലാഭം, ഹാജരായ ആകെ തൊഴിലാളികളുടെ എണ്ണം കൊണ്ട് ഹരിച്ച് ലാഭ വിഹിതം കണക്കാക്കണം. കൃഷി ഡിപ്പാർട്ട്മെന്റിന്റെ സബ്സിഡി (രണ്ടര ഏക്കറിനു ഇരുപതിനായിരം രൂപ ഗ്രൂപ്പിനും അയ്യായിരം രൂപ സ്ഥലമുടമയ്ക്കും‌‌‌) വെവ്വേറേ കണക്കാക്കി ഇരുപത്തിയെട്ടായി വീതം വെക്കും. എല്ലാം മീറ്റിംഗുകളിലൂടെ സമവായത്തിലെത്തി.


എന്തൊക്കെയിനം കൃഷികളാണാദ്യം തുടങ്ങിയത്, അതൊരു വെല്ലുവിളിയായി അനുഭവപ്പെട്ടുവോ?

ചർച്ചകൾക്കും തീരുമാനങ്ങൾക്കുമൊടുവിൽ കൃഷിക്കിറങ്ങേണ്ട സമയം സംജാതമായി. യാഥാർത്ഥ്യത്തെ അഭിമുഖീകരിക്കേണ്ട സമയം. എന്തെല്ലാം കൃഷികൾ, വിത്തുകൾ, നടീൽ വസ്തുക്കൾ, ജൈവമോ, രാസമോ, എങ്ങിനെ... എപ്പോൾ, ജല ലഭ്യത, പെട്ടെന്നു വരുമാനദായകമായത് ഏത്, സീസൺ, മാർക്കറ്റ്..അങ്ങനെ നിരവധി പ്രശ്നങ്ങൾ. വട്ടപ്പൂജ്യം എഴുതി ഒപ്പിടാറുള്ള അമ്മൂമ്മമാർ വരെ ഉൾപെട്ട ഗ്രൂപ്പ് ചർച്ചകൾക്കൊടുവിൽ എല്ലാത്തിനും സമാധാനം കണ്ടെത്തി. കൃഷികൾ തുടങ്ങി. ചീര കാബേജ് പിന്നെ ഒരോന്നു കൂട്ടിചേർത്തു. അങ്ങനെ പതിനേഴ് ഇനം കൃഷികൾ, കിഴങ്ങു വർഗങ്ങളും, പച്ചക്കറികളും എല്ലാം. ചീരയുടെ വിളവെടുപ്പ് ആവേശം തന്നു. ജൈവ കൃഷി എന്ന് ഇതിനകം പ്രാദേശികമായി പരന്ന വാർത്ത സഹായകമായി. ആളുകൾ തിരക്കി വന്നു വാങ്ങി. ആദ്യവട്ട വിളവെടുത്ത ചീര വളരെ പെട്ടെന്ന് തീർന്നു. അടുത്ത ട്രിപ്പ് കിളിർപ്പിച്ചു. പീച്ചിൽ വില്പന തുടങ്ങി. വില്പനയ്ക്ക് സമയം നിശ്ചയിച്ചു. യാത്ര നീളുകയാണു്. ചെറിയ അലോഹ്യങ്ങൾ ഉണ്ടാകാതിരുന്നിട്ടില്ല. പലതും ചായ കോപ്പയിൽ കാറ്റുപോലെ കെട്ടടങ്ങി. എണ്ണയിട്ട യന്ത്രം പോലെ ഒരു കൂട്ടായ്മ..

അങ്ങയുടെ ഈ കൂട്ടായമയെക്കുറിച്ചോർക്കുമ്പോൾ സന്തോഷമാണെന്നറിയാം. എങ്കിലും ഇവരുടെ പ്രവർത്തനങ്ങളെ എങ്ങനെ വിലയിരുത്തുന്നു? സംതൃപ്തി നൽകുന്നുവോ..?

തീർച്ചയായും. തിരിഞ്ഞു നോക്കുമ്പോൾ വളരെയധികം സംതൃപ്തി നൽകുന്ന ഒന്നാണീ കൂട്ടായ്മ.

കൃഷി ടീമില്‍ ആകെ 28 പേര്‍ ആണെന്ന് പറഞ്ഞല്ലോ. പുരുഷന്മാര്‍ 5 പേര്‍. സ്ത്രീകള്‍ 23.  ഇതിനെ ടീം എന്ന് പറയാനാകില്ല. പ്രദേശ വാസികളായ, തൊഴിലുറപ്പില്‍ തൊഴില്‍ വേണമെന്ന് ആ സമയം അപേക്ഷിച്ച 28 പേര്‍.  99% പേരും സാമ്പത്തികമായും വിദ്യാഭ്യാസപരമായും പിന്നോക്കാവസ്ഥയിലുള്ളവര്‍ . തൊഴിലുറപ്പില്ലെങ്കില്‍ പണിക്കു പോകാത്തവര്‍, തൊഴിലുറപ്പ് ഇല്ലെങ്കില്‍ ചെമ്മീന്‍ കിള്ള്നു പോകുന്നവര്‍, മീന്‍ പിടിക്കാന്‍ പോകുന്നവര്‍, തൂമ്പ പണിക്കാര്‍, ചുമടിന് പോകുന്നവര്‍,,, വളരെ നാളായി സ്ത്രീ തൊഴിലാളികളെ കൈകാര്യം ചെയ്തു പരിചയമുള്ള കൈരളി എന്ന സ്ത്രീ ആണ് മേറ്റ്‌. ആകെയുള്ള 5 ആണുങ്ങളില്‍ വേലപ്പന്‍ എന്ന സുഹൃത്തിന് മാത്രമാണ് നേരിട്ട് പച്ചക്കറി കൃഷിയില്‍ പരിചയം. പെണ്ണുങ്ങളിലും 2 പേരെ അങ്ങനെ കിട്ടി. കൌസുവും, ഭാരതിയും. ആദ്യ ദിവസം വിളിച്ചു ചേര്‍ത്ത യോഗത്തില്‍ നേരത്തേ പരസ്പരം കുറച്ചൊക്കെ തമ്മില്‍ അറിഞ്ഞിരുന്നെങ്കിലും എല്ലാപേരും പേര് പറഞ്ഞു പരിചയപ്പെട്ടു. തൊഴിലുറപ്പിന്റെ രീതി മാറിയതിനെ കുറിച്ച് അവരോട് പറഞ്ഞു. എന്തെല്ലാം കൃഷി വേണമെന്ന് അവരെക്കൊണ്ടു തന്നെ പറയിച്ചു. എല്ലാവര്ക്കും പരിചയമുള്ളത് ചീര. എന്നാല്‍ ഒരു ചീരയോ മുളകോ പോലും നാട്ടു നനചിട്ടില്ലാത്ത പലരും ഉണ്ടെന്നറിഞ്ഞു. സുഖമില്ലായ്കയാല്‌ ഒരു സ്ത്രീ ആദ്യമേ ഒഴിവായി. പ്രായം ചെന്ന പെണ്ണമ്മയും തുളസിയും അല്‍പ്പം മടി കാണിച്ചു. അതിനും മേറ്റ്‌ വഴി കണ്ടു. അവര്‍ ചായ കഞ്ഞി കുടിവെള്ള വിതരണം ആകട്ടെ. സമ്മതിച്ചു. സ്ഥലം, വിത്തുകള്‍ , വളങ്ങള്‍, ഓഫീസുകളുമായി ഇടപാടുകള്‍ എന്നിവ എന്റെയും കൈരളിയുടെയും ചുമതല, ഓരോന്നിനും പറ്റിയ നിലമൊരുക്ക്, സ്ഥാനം, രീതി, ഇവ വേലപ്പന്റെ ചുമതല. നനയുടെ മേല്‍നോട്ടം ജനാര്‍ദ്ദന്‍; അങ്ങനെ പോയി കാര്യങ്ങള്‍.... ആദ്യമേ എന്റെ സ്ഥലം 85 സെന്റ് വിട്ടുകൊടുത്തു. ഇതിനായുള്ള സമ്മത പത്രം(11 മാസത്തേക്ക്) പഞ്ചായത്തില്‍ നല്‍കി. പണി തുടങ്ങി, കാടും പടലും മാറ്റി, ചീരക്കു കളം ഒരുക്കി. ചീര നട്ടു. പ്രവര്‍ത്തനങ്ങള്‍ കാണാന്‍ എത്തിയ ഓമനക്കുട്ടനും അദ്ദേഹത്തിന്‍റെ സ്ഥലം വിട്ടു തന്നു.. ജോലികള്‍ പുരോഗമിക്കവേ തൊട്ടു തൊട്ടു അയൽവാസികള്‍ ഹരി, ലളിത് തുടങ്ങി ഓരോരുത്തര്‍ സ്ഥലം വിട്ടു തന്നു. അതോടെ ഗ്രൂപ്പ്‌ ഉഷാറായി. വര്‍ക്ക്‌ കൂടിക്കൂടി വന്നു. നേരത്തേ പരിചയം ഇല്ലാത്തവര്‍ ഏണും കോണുമില്ലാതെ വാരം എടുത്തപ്പോഴും നിര്‍ദ്ദേശമില്ലാതെ തോന്നിയത് ചെയ്യാന്‍ തുടങ്ങിയപ്പോഴും.. ക്ഷമയോടെ ഇടപെട്ടു. പിന്നെപ്പിന്നെ ഏതാണ്ട് എല്ലാപേരും ഒരു ദിശയില്‍ എത്തി. ചീര വളര്‍ന്നു വില്‍പന ആയി 3000 രൂപയ്ക്കുമേല്‍ വിറ്റു വരവ് എത്തിയപ്പോള്‍ ഗ്രൂപ്പിന്റെ ആത്മ വിശ്വാസം കൂടി വന്നു.

ഇത്രയും വിവരങ്ങൾ ഇ-മഷി മാഗസിനു വേണ്ടി വളരെ ക്ഷമയോടും കൃത്യമായും തന്ന അങ്ങയോട് മഷി ടീമിന്റെ പ്രത്യേക നന്ദി അറിയിക്കുന്നു.

ഒരു ഓൺലൈൻ മാഗസിൻ കാർഷിക ലേഖനം മുടങ്ങാതെ പ്രസിദ്ധീകരിക്കുക, അതിനായി സമയം ചെലവഴിക്കാൻ ഒരു കൂട്ടം ചെറുപ്പക്കാർ... കർഷകസ്നേഹികളായ ഒരു പുതുതലമുറയെ ഞാൻ സ്വപ്നം കാണുന്നു. നിങ്ങളുടെ സദുദ്യമത്തിനു എന്റെ എല്ലാ വിധ പിന്തുണയും, പ്രാർത്ഥനയും. നമസ്കാരം.

by navas shamsudeen. 5 Comments

എരുക്ക്




സാധാരണയായി ആറടി മുതൽ എട്ടടി വരെ ഉയരത്തിൽ കാണപ്പെടുന്ന എരുക്ക് കുറ്റിച്ചെടി 
വിഭാഗത്തിൽ പെടുന്നു. ഇലകൾ ഏകദേശം ആറിഞ്ചു നീളവും മൂന്നിഞ്ച് വീതിയും കാണുന്നു
ഇലകളുടെ കോണിൽ നിന്നുമാണു പുഷ്പങ്ങൾ ഉണ്ടാകുന്നത്, പൂക്കളുടെ ഉൾഭാഗത്ത് ചുവപ്പും 
പുറത്ത് വെളുപ്പും നിറം കാണപ്പെടുന്നു. കറയുള്ള ചെടിയായ എരുക്കിന്റെ ബീജം കറുപ്പ് നിറമുള്ളതും കാറ്റത്ത് പറന്നു നടക്കുന്നതുമാണു. കുട്ടികളുടെ പ്രിയ തോഴനായ അപ്പൂപ്പൻ താടിയാണു ഇതിന്റെ ബീജം. വസന്തത്തിൽ പൂക്കുകയും ഗ്രീഷ്മത്തിൽ കായ്കളുണ്ടാവുകയും ചെയ്യുന്ന എരിക്ക് പൂവിന്റെ നിറഭേദമനുസരിച്ച് രണ്ടു തരത്തിൽ കാണപ്പെടുന്നു. ചുവന്നതും വെളുപ്പും.
ഔഷധ ഉപയോഗങ്ങൾ.
ഇത് വാതഹരവും, ദീപനവും ഉഷ്ണവും കൃമികളെ നശിപ്പിക്കുന്നതുമാണു, നീര്, ചൊറി, കുഷ്ട വൃണം, പ്ലീഹരോഗം എന്നിവയ്ക്കും വളരെ നല്ലതാണ്. സിദ്ധവൈദ്യത്തിലെ നീറ്റുമുറകളിൽ, എരിക്കിൻ പാൽ ഉപയോഗിക്കുന്നുണ്ട്. പെരുകാൽ, ആമവാതം, എന്നിവയ്ക്ക് എരുക്കില ചൂടാക്കി വെച്ച് കെട്ടുകയും, എരുക്കിൻ നീരിൽ നിന്നും കാച്ചിയെടുത്ത തൈലം തേയ്ക്കുകയും ആവാം.
ചെവി വേദനയ്ക്കു ചെവിയിൽ ഒഴിച്ചാൽ ശമനം കിട്ടും. വൃണങ്ങൾ ഉണങ്ങുവാൻ ഇലയുടെ ചൂർണം തേയ്ക്കുന്നതും നല്ലതാണ്. ഗണ്ഡമാല, മുഴകൾ എന്നിവയ്ക്ക് എരുക്കിന്റെ പാല് ലേപനം ചെയ്യണാം. പല്ല് വേദനക്ക് പഞ്ഞിയിൽ മുക്കി വേദനയുള്ളിടത്ത് വെക്കുക. സർപ്പ വിഷത്തിൽ, എരുക്കിൻ വേരിന്റെ നീര് കുരുമുളക് ചൂർണം ചേർത്ത് സേവിപ്പിക്കാം.
എരുക്കിന്റെ പൂവ് : വാതം, കഫം, കൃമി, കുഷ്ടം, ചൊറി, വിഷം, വൃണം, പ്ലീഹരോഗങ്ങൾ, കരൾ രോഗങ്ങൾ, രക്തപിത്തം, അർശസ്, മഹോദരം, വീക്കം, എലിവിഷം, പേപ്പട്ടി വിഷം ഇവയെ ശമിപ്പിക്കും. സുശ്രുത മതമനുസരിച്ച് കഫ പിത്തങ്ങളെ ശമിപ്പിക്കും.

കറ : വിശേഷിച്ച് അർശസ്, കൃമി, കുഷ്ടം, മഹോദരം ഇവയെ ശമിപ്പിക്കും. വയറിളക്കാൻ വളരെ നല്ലതാണ്. ഇല ചെവിവേദന ഇല്ലാതെയാക്കുന്നു.

വേര്: കഫം, വായുമുട്ടൽ, ചുമ, അതിസാരം, പീനസം, പ്രവാഹിക, രക്തപിത്തം, ശീതപിത്റ്റ്ഹം, ഗ്രഹണി, വേദനയോടു കൂടിയ യോനി രക്ത സ്രാവം, തേള് മുതലായവയുടെ വിഷം ഇവയേയും കഫജങ്ങളായ മറ്റെല്ലാ രോഗങ്ങളെയും ശമിപ്പിക്കുന്നു.

.